النرجسية | Narcissism
النرجسية | Narcissism
بقينا بنسمع كتير كلمة
نرجسية سواء على السوشيال ميديا او بينا و بين صحابنا... لما بنشوف حد بينزل صورته على اى موقع من مواقع
السوشيال ميديا و نلاقيه بيحب فى نفسه و بيتغزل فى نفسه بدرجة مبالغ فيها بنقوله
ايه يا عم النرجسية اللى انت فيها دى؟؟
هحكيلك قصة افهمك بيها يعنى ايه كلمة نرجسية ...
الاساطير اليونانية
القديمة بتقول ان كان فى شاب اسمه "نارسيس" فى يوم كدا و هو ماشى لمح
انعكاس وشه فى بحيرة و وقع فى غرام نفسه وحب نفسه اوى و بقا كل يوم يروح للبحيرة
دى عشان يشوف انعكاس صورته على الماية و بدأ يتغزل فى نفسه اوى و كل ما الايام
بتعدى كل ما حبه لتفسه يزيد لحد ما فى يوم من الايام نط فى البحيرة عشان يلمس
صورته و غرق ومات و ظهرت فى البحيرة دى وردة و اتسمت " النارجس"
و نسبة ل نارسيس و
قصته دى ظهرت حاجة اسمها " اضطراب الشخصية النرجسية"
يعني ايه " نرجسية" ؟
النرجسية يعنى حب الذات و الانانية و دى مرحلة
اعلى من مرحلة الغرور يعنى الشخص لما بيكون واثق في نفسه اوى بيوصل لمرحلة الغرور
و لما بيزيد بيوصل لمرحلة النرجسية.. الشخص النرجسى بيكون عنده إضطراب فى الشخصية
بيكون دايما مغرور و متعالى و عنده حب إمتلاك الأشياء و الأشخاص و دايما
بيحب يتكلم عن نفسه كتير بكل مميزاته حتى لو مكنش عنده مميزات و دايما بينكر
عيوبه، دايما بيبالغ فى إظهار إنجازاته و مواهبه و عنده حب السلطة ودايما بيعتقد إن
مفيش حد أعلى منه.
العالم النمساوى الشهير"سيجموند فرويد" قال
إن النرجسية دى حاجة طبيعية فى مراحل نمو الطفل ؛ و لو الطفل فشل فى تخطي المرحلة دي و فضلت معاه لما بعد سن البلوغ هتتحول لإضطراب !
الشخص النرجسي فى علم النفس هو الشخص المتغطرس اللي
شايف نفسه دايما كامل زى ما قولنا قبل كدا و إن مش أى حد هيقدر يفهمه يعني علشان
تتكلم معاه لازم تكون فاهم و عارف .. هو أى حد هيتكم معاه ولا ايه؟
طبعا انت اكيد هتقول إن الشخص النرجسي ده شخص
مكروه و الناس مش بتحبه و بتبعد عنه بس بالعكس تمامًا الشخص ده فى الأول بيعرف
يعمل علاقات كتير مع الناس لإنه طبعا شخص عنده كاريزما و الناس بتعجب بيه
و إنه دايما بيهتم بشكله و مظهره و واثق فى نفسه فتبدأ الناس تتلم حواليه و بيكون
جذاب بالنسبة ليهم و لكن الحلو مش بيدوم..
الناس اللى حواليه بعد كدا لما يبدأوا
يقربوا منه و تتطور علاقتهم بيه و يتعمقوا
فى العلاقة بتبدأ الصفات النرجسية تظهراكتر على الشخص و يبان على حقيقته و
يفهموا إن دا شخص مش طبيعي إنه يكون مغرور دايما و
شايف نفسه عليهم و على طول يحبط فيهم ف كل الناس تبدأ تبعد.
يا ترى ايه الاسباب اللي تخلي الشخص يوصل لحالة النرجسية؟؟
سبب الإصابة باضطراب الشخصية النرجسية غير معروفه إلى حد ما و الإسباب ممكن تكون معقدة احيانا .. و
لكن بيرتبط ظهور أعراض النرجسية بشوية عوامل:
البيئة المحيطة بالشخص :عدم التوافق فى العلاقات بين الطفل و اهله يعني
مثلا الإعجاب المفرط او الإنتقاد المفرط بس بالقدر اللى مش متوافق مع خبرة الطفل.
عوامل وراثية: نتيجة صفات موروثة.
البيولوجية العصبية: وهي العلاقة بين المخ و التفكير و السلوك.
ياترى ايه هي أعراض النرجسية؟؟ و امتى نقول على الشخص دا إن عنده اضطراب الشخصية النرجسية!!؟؟
أعراض النرجسية بتختلف من شخص للتاني و بتختلف
حدتها من شخص لشخص ، و الاشخاص اللي بيتسموا بالاضطراب عندهم شوية صفات كدا
هنقولهم مع بعض:
·
احساس مبالغ بأهمية الذات.
·
دايما بيحسوا بانهم محور الكون و انهم هما بس
المتميزين و مفيش غيرهم هيتفقو عليهم.
·
دايما بيتوقعوا انهم هينجحوا و هيحققوا المستحيل
حتى لو كانت انجازاتهم بسيطة.
·
المبالغة فى اظهار مواهبهم و انجازاتهم و نجاحهم.
·
بيقللوا من الاشخاص اللى حواليهم و ع طول يحبطوهم
و دايما مش بيرضوا ان يكون حد اعلى منهم.
·
اسلوبهم متغطرس و متكبر .
·
منشغلين دايما بالنجاح و التميز مش عشان نفسهم لا
دا عشان يتكبروا على اللى حواليهم .
·
مش بيتقبلوا النقد ابدا و مستحيل يسمحوا لاى حد
انه ينتقد او يعترض على اى حاجة بيعملوها.
·
عندهم صعوبة فى اظهار مشاعرهم و احاسيسهم.
·
كدا انا قولتلك اهم الاعراض اللى ممكن تحدد بيها
اذا كان الشخص اللي بتتعامل معاه عنده اضطراب شخصية نرجسية او لا..
فى حاجة مفاجأة بقى إن الشخص النرجسي ده بكل عيوبه ممكن يكون احسن و اذكى من الشخص اللى مش نرجسى!!
ايه الكلام الغريب ده انت بتناقد اللي قولته قبل
كده!
استنى بس انا هفهمك بالراحة...
فى دراسة اتعملت على 300 طالب نرجسي فى إيطاليا
و بالمقارنة بمستوى ذكائهم لقوا انهم بيجيبوا درجات كويسة و حلوة جدا و إن الأشخاص
اللي مش نرجسيين و نفس مستوى ذكاءهم بالظبط جابوا درجات أقل منهم لدرجة إن الأشخاص
اللي مستوى ذكاءهم أعلى من الاشخاص النرجسية مكانوش بيجيبوا
الدرجات دي ولا بيعرفوا يوصلولها و ده لإن الشخصية النرجسية بيكون عنده إصرار شديد
اوى إنه ينجح عشان ميكونش حد اعلى منه.
قادة من التاريخ كان عندهم هوس و مرض النرجسية.
من كتر ما الشخص النرجسى بيكون فاكر و معتقد انه
هو الأصلح للقيادة ممكن يوصل إنه يكون قائد فعلا زى كتير من الزعماء و القادة
فى التاريخ يحتمل إنهم أشخاص نرجسيين زى مثلا نابليون بونابرت ، الإسكندر الأكبر و
دونالد ترامب....
امتى المفروض الشخص النرجسى يلجأ للطبيب؟..
فى بعض الأحيان الأشخاص اللي عندهم إضطراب الشخصية
النرجسية مش بيعتقدوا إن عندهم مرض او إن فى حاجة غلط فى شخصيتهم و غالبا مش
بيحبوا يعترفوا بأنهم عندهم إضطراب شخصية نرجسية،عشان كده مش بيدوروا على علاج او
حتى يعرضوا حالتهم على طبيب مختص، بيفتكروا إن دي ممكن تكون أعراض الاكتئاب أوتعاطي
المخدراتأ والكحول أو مشاكل تانية مرتبطة بالصحة العقلية. و من كتر الإهانات
الموجهة ليهم من ناس حواليهم أو حتى من نفسهم بتخلي قبول العلاج صعب وإنهم يتعرضوا على دكتور
أصعب...
لو انت حاسس في حاجة فى شخصيتك مش مظبوطه و إنك
بقيت متغير شويه عن الأول و حاسس بأى أعراض من أعراض النرجسية اوعى تتردد ابدًا إنك
تزور طبيب مختص و اوعى تتكسف ابدا بالعكس انت هتساعد نفسك على فكرة ومفيش اي داعٍي
للحرج..
و أخيرا بالرغم من وصف النرجسية السهل إلا إن
تشخصيه صعب جدا و اكيد برضو وسايل التواصل الإجتماعى ليها دور كبير فى ظهور
الشخصية دي و ظهور أعراضها .. ولازم نعرف إن الكمال لله وحده و مفيش فينا حد كامل
و كلنا عندنا نقاط ضعف و نقاط قوة و كل واحد فينا ليه حااجات بتميزه عن غيره و
لازم طبعا نكون واثقين من نفسنا بس مش لدرجة الغرور عشان منوصلش لدرجة النرجسية....
“I think a lot of psychopaths are just geniuses who drove so fast that they lost control.”
―
Sources:
تظهر الإعلانات هنا
تعليقات