Heart Failure

القلب العضو اللى حجمه أقل من نص كيلو جرام المسؤول عن ضخ حوالى 5 لتر من الدم ،دايما شغال من غير تعب أو شكوى ، فى القلب عندى فى ميزان بين حاجتين الدم اللى طالع من القلب و احتياجات القلب من الأكسجين ولو حصل أى خلل فى الميزان دا بيحصل عندى فيما يعرف بفشل عضلة القلب، أول ما بنقرأ الكلمة دى ممكن إننا نفتكر إن القلب مش بيشتغل وإنه بيقف خالص ولكن الحقيقة إن دا مش صح.

القلب بيكون شغال ولكن مش قادر إنه يطلع كمية الدم اللى متعود إنه بيطلعها طب ودا ممكن يكون بسبب أيه ؟ ممكن يكون بسبب زيادة فى ضغط الدم أو ذبحة أو سكر أو إن جزء من القلب مش واصله أكسجين فمأثرعلى القلب كله إنه مش قادر يستقبل الدم ويضخه كالمعتاد. ممكن نفتكر إنه مرض نادر ولكن العكس ففى أمريكا وصل لحوالى 5.7 مليون مريض و بيسجلوا حوالى 550 الف حالة فى السنة.

لكل فعل رد فعل

لما القلب بيلاقى نفسه إنه مش قادر يضخ زى الأول بيبدأ جسمى يحاول إنه يساعده عن طريق شوية تعديلات فى القلب يبدأ حجم القلب إنه يزيد فى محاولة منه إنه يحسن قوة القلب ولكن بتبدأ العضلة تطول Remodeling of heartأكبر من اللازم ومتعرفش تنقبض ودا بسميه

يبدأ كمان جسمى يحس إن الدم اللى خارج بقى قليل فيبدأ إنه يزود الضغط وضربات القلب أكتر ويبدأ إنه يحتفظ بالمية لأنه فاكر إن المية اللى فى الجسم قليلة فى محاولة إنه يصلح المشاكل

هل لفشل القلب أنواع ؟

فى الحقيقة أيوة فى كذا تقسيمة لأنواع فشل عضلة القلب:

أ‌- حسب المكان الي

· فشل الجزء الايسر من القلب (الأكتر انتشارا)

· فشل الجزء الأيمن من القلب ( فى الاغلب بيكون تابع لفشل فى الجزء الأيسر)

ب‌- حسب انهى جزء فى ضخ الدم

· مشكلة فى انقباض عضلة القلب فيما يعرف ب (HFrEF)-1

· بسبب موت فى نسيج القلب فمش قادر إنه يضخ الدم بنفس القوة اللى كان بيضخ بيها

· مشكلة فى انبساط عضلة القلب فيما يعرف ب (HFpEF)-2

· بسبب تضخم عضلة القلب فبالتالى مش قادر إنه يملى بالدم كويس زى الأول

ج- حسب التصنييف الوظيفي الي

· الفئة 1: ودول اللى معندهمش أى تأثير على نشاطاتهم اليومية يعنى لو متعود إنه يطلع أربع أدوار هيطلعهم هم هم عادى بدون مشاكل

· الفئة 2: ودول بيبدأ يظهر عليهم تاثير بسيط على نشاطاتهم اليومية يعنى يبدأ إنه يطلع الأربع أدوار بس يتعب بعدها

· الفئة 3: دول بيبدأ يظهر عليهم تأثير واضح لدرجة إنهم بيكونوا مش قادرين إنهم يطلعوا الأربع أدوار ويبداوا عند الدور التانى أو التالت وخلاص مش قادرين

· الفئة 4: دول هنا بيكونوا مش قادرين إنهم يعملوا أى نشاطات وبيتعبوا حتى وهم قاعدين

الأعراض

هلاقى المريض عنده إجهاد – وجع فى الصدر – التنفس بقى قصير بيجى العيان يقول إنه عنده كرشة نفس وإن نفسه مكتوم بسبب تجمع السوايل فى الرئة – تجمع سوايل فى الجسم كله وانتفاخ الجسم ولما بيضغط على الجزء المنفوخ دا بيفضل مكان الضغطة لسه موجود.

التشخيص

أول حاجة بيتم الشك من الأعراض اللى عنده ولما يبدأ الدكتور إنه يسمع صوت ضربات القلب بيلاقى صوتها مش طبيعية والضربات سريعة، فيبدأ إنه يخليه يعمل رسم قلب ويعتبر هو أكتر طريقة مستخدمة فى التشخيص ودا هرمونNatriuretic peptide ممكن كمان إنه يخليه يعمل شوية تحاليل زى تحليل هرمون بيطلع من البطين لو فى مشكلة فى عضلة القلب فبلاقى انه زيادة عندى

العلاج

فى الأول هو أنا بيكون هدفى ايه من العلاج قبل ما نعرض الأدوية هدفى إنى أقلل الحمل على القلب عن طريق إنى أوسع الأوردة والشرارين و إنى أنزل المية اللى متحوشة فى جسمى كله دى و إنى امنع تحول خلايا القلب لخلايا مش عارفه إنها تنقبض

1- أول مجموعة معانا هى مثبط انزيم محول الأنجيوتنسين (ACE inhibitors):

المجموعة دى من الأدوية مميزة جدا لإنها من الاسم بتمنع تكوين أنجيوتنسين 1 ودا لما بيتكون بيزود ضغط الدم وبيخلى جسمى إنه يحوش مية وبيخلى عضلة القلب تطول زيادة عن اللزوم وتموت طب أنا كدة بمنع تكوينه فبالتالى كدة أنا معنديش كل اللى قولتها دى ، وبعالج المشاكل اللى بيعانى منها مريض القلب فالمجموعة دى تعتبر الأحسن لمريض فشل عضلة القلب.

الانزيم اللى بتوقفه دا بيكسر Bradykininالمادة دى هتساعدنى فى تقليل الضغط برضو ولكنها بتخلى المريض يكح عشان كدة لو المريض كان عنده مشكلة أقدر استعمل مجموعة زيها بالضبط ولكن مش بتسبب الكحة عن طريق انها بتقفل المستقبل اللى بيشتغل عليه الانجيوتنسين 1 دا وهى (ARBs)

وهنا أغلب ادوية الACE بتكون بتنتهي بمقطع Pril زي Enalapril – Captopril اللى موجودين في السوق باسم Ezapril – Capoten وعيلة الARBs بتنتهي بمقطع Sartan زي Valsartan (tareg)

2- تانى مجموعة وهى حاصرات مستقبلات بيتا (Beta Blockers):

ودى عندى هنا من الاسم بتشتغل عن طريق إنها تقفل مستقبلات بيتا اللى موجودة على القلب بيكون مسؤول عن إنه يزود كل خصائص القلب وإنه يزود شغل القلب أكتر من اللازم ، والمستقبل دا موجود على الكليتين بيشغل انزيم الرينين اللى بيكون مسؤول عن تكوين هرمون الالدوسترون اللى بيحوش المية فى جسمى، كمان مستقبلات بيتا لما بشغلها لمدة طويلة بتكون سبب فى زيادة طول عضلة القلب وموتها فبالتالى أنا لما بقفل المستقبل دا فبتقلل الحمل على القلب لإنها بتقلل كل خصائص القلب وكمان بقلل جسمى وبمنع تحول العضلة لخلايا مش قادرة إنها تنقبض كمان. واغلب العيلة بتنتهي بالمقطع olol زيBisoprolol (Concor) (Bisocard) – Carvedilol (Carvid).

عندى مجموعة من الأدوية المساعدة فى الأعراض زى إنى اقلل المية فى الجسم وهى (Diuretics) :

الطبيعى فى جسمى إن الصوديوم مينزلش فى البول وإنه يرجع كله للدم عن طريق وحدة الوظيفية للكلية (النفرون) ولما بيرجع بيسحب معاه مية ، طب أنا هنا عاوز أقللها فكدة أمنع رجوع الصوديوم.

أول مجموعة عندى :(Loop diuretic)في المجموعة دى بتمنع رجوع الصوديوم فى جزء من النفرون اسمها حلقة هنلى التصاعدية فيبدأ الصوديوم ينزل فى البول أكتر والمجموعة دى تعتبر قوية جداً فبستخدمها فى الحالات الشديدة من تجمع المية فى الجسم ومن الأمثلة عليها Furosemide (Lasix).

المجموعة التانية (Thiazide) هنا بتبدأ تمنع رجوع الصوديوم برضو بس فى جزء من النفرون اسمه:

النبيبات الملتوية البعيدة (Distal Convoluted Tubule) فيبدأ إنه ينزل فى البول وبستعمل المجموعة فى الحالات الضعيفة أو المتوسطة من تجمع المية فى الجسم. وزى ما قولنا بتكون الأدوية بجانب الأدوية الأساسية اللى عندى كإضافة زى Hydrochlorothiazide (Alkapress) (Exforge HCT)

العلاج فى المستقبل

من خلال السنين تطور فهمنا أكتر عن فشل القلب وتم اكتشاف أدوية كتير وتم قبولها من منظمة الصحة العالمية وثبتت فعاليتها إنها قللت عدد الوفيات وحسنت حالات كتير ومن الأدوية Ivabradine

وكمان خليط من دوائين Sacubitril / Valsartan وكمان لقوا إن فى عيلة من أدوية السكر بتساعد في العلاج وإنها ممكن تكون الحل الأفضل لمريض السكر اللى عنده فشل فى القلب وهى SGLT-2 inhibitor بيتم كمان التفكير فى دوا نقدر نعرف مين هيتحسن عليه ومين لا ، وبيتم التفكير فى تطوير جهاز LVAD دى عبارة عن مضخة بتتزرع جوا الصدر عشان تساعد البطين فى إنه يضخ الدم ولكن مشكلتها إنها بتكون طالع من الجلد سلك فبيكون عرضة لعدوى وكمان إنه مش عارف يعيش حياته بشكل طبيعى