طبعا كلنا عارفين كويس صيام شهر رمضان و كتير مننا سمع عن الصيام المتقطع لكن سمعت قبل كده عن صيام

  !؟ Dopamine fastالدوبامين

اهو ده بالظبط اللي هنتكلم عنه النهارده ، بس في البدايه كده خلينا نسأل سؤال بديهي  ايه هو الدوبامين؟ 

هو نوع من الناقلات العصبيه  Neurotransmitters  بيصنعها الجسم و بيستخدما جهازنا العصبي لارسال الرسائل بين الخلايا العصبيه و بيلعب دور مهم جدا في شعورنا بالسعاده. و يعتبر هو الهرمون المسؤل عن الرغبه و الحافز لفعل اي شئ متوقع تحصل منه علي مكافأة هرمون التشجيع.    

يعني مثلا لو انت عطشان و فيه قدامك كوبايه ميه فمخك هيفرز هرمون الدوبامين علشان يشجعك انك تشربها لانه هيحصل علي مكافأة من الفعل ده و هي الارتواء . 

طيب انا ليه محتاج صيام الدوبامين اصلا ؟ 

عمرك سالت نفسك انت ليه لما بتفتح السوشيال ميديا و بتفتضل scroll down لوقت كبير قد يصل لساعات مش بتمل و لما بتاخد قرار انك هتسيب الموبايل دلوقتي و تروح تعمل حاجه مهمه القرار مش بيكون سهل رغم انه بسيط جدا ؟!  

الاجابه هي الدوبامين يا ساده اللي هو شغلانته انه يشجعك حيث ان مقدار الدوبامين اللي مخك بيفرزه بيتوقف علي مدي سرعه الحصول علي المكافأة و مدي الجهد المطلوب للحصول عليها بمعني ان كل ما كانت المكافأة او المتعه كبيره و مطلوب ليها مجهود اقل كل ما كانت كميه الدوبامين اللي هيفرزها المخ اكبر و ده بالظبط اللي حصل ان مجهود المطلوب لتصفح الإنترنت قليل جدا في مقابل انك بتحصل علي تسليه و مكافأة فوريه فبالتالي مخك بيفرز هرمون الدوبامين بكميه كبيره تشجعك انك تستمر.   

و طبعا مش محتاجه اقولك انك لما بتيجي تقوم بعمل بيتطلب جهد كبير زي المذاكره او الشغل و مكافأته مؤجله لوقت بعيد ان مخك بيفرز كميه صغيره من الدوبامين علشان كده مش بيكون عندك حافز قوي انك تقوم تذاكر .

و الكلام ده ينطبق علي اي عمل مكافأة القيام بيه مش بتحصل عليها فورا.  

طيب لحد هنا و كلام علمي و منطقي و جميل جدا طيب ليه برضو محتاج صيام الدوبامين؟ الاجابه هي الادمان !

بالظبط زي ما قرأت كده خلينا بقي نعرفه في السطور الجايه .  

الادمان : 

الادمان بكل بساطه هو اضطراب في نظام المكافأة في المخ بمعنى ان مثلا لو شخص متعود انه يلعب العاب

فيديو بإستمرار مع مرور الوقت و المدوامه عليه ا هتزيد نسبه الدوبامين اللي بيفرزها المخ لتخفيز الشخص ده انه يلعب الالعاب و كميه الدوبامين العاليه دي بالنسبه للجسم مش حاله طبيعيه و احنا عارفين طبعا ان الجسم بيسعي دايما للتوازن Homeostasis  و الاستقرار و بيبدا يتعامل مع كميه الدوبامين العاليه دي علي انها الوضع الطبيعي علشان يحس دايما بالاستقرار و بالتالي الشخص ده بيشعر برغبه مستمره في انه يلعب العاب الفيديو علشان مخه يرتاح و يشعر بانه في الوضع الطبيعي ، علي الجانب الاخر بقي لما نفس الشخص ده ييجي يقوم

باعمال مهمه زي الشغل او المذاكره كميه الدوبامين القليلة اللي المخ هيفرزها مش هيكون ليها تاثير مشجع علي الاطلاق و هيواجه الشخص ده صعوبه كبيره في القيام باي عمل اخر . و الكلام ده بينطبق علي اي فعل الانسان بيقوم بيه بشكل مبالغ فيه و هو ده بالظبط مفهوم الادمان .

الشخص اللي بيوصل لمرحله انه ادمن اي فعل لدرجه انه مايقدرش يوقف فعله بسهوله و بيقضي معظم وقته بيعمله لازم يتبع صيام الدوبامين علشان يرجع لمخه التوازن في افراز الهرمون ده لان الوضع بالشكل ده كارثي

طيب ازاي بقي نقوم بصيام الدوبامين؟  

في الحقيقة كلمه صيام الدوبامين Dopamine fast  مش دقيقه لاني مش بمنع جسمي نهائي من افراز الهرمون ده لان ده مش شئ انا بتحكم فيه لكن انا بقلل افرازه بس مش اكتر فممكن نقول Stimulus controlكمصطلح علمي ادق.   

عالم النفس والأستاذ في جامعة كاليفورنيا في سان فرانسيسكو الدكتور "كاميرون سيباه" هو أحد رواد هذه الفكرة واللي ساعد في انتشارها بقوة اوصي ان الصيام عن الشئ اللي انت عايز تتحرر منه مش هيكون صيام لفترات كبيره متصله لان كده مخك مش هيعرف يتعامل فجأه مع الوضع الجديد وده يعتبر خطا لان الافراط في الصيام مش هو الاسلوب السليم اللي نقدر نستعيد بيه توازن المخ ، و لكن الصيام ممكن يكون اربعه ساعات يوميه ثم يوم كامل في الاسبوع و هكذا ، بمعني انك بتقلل القيام بالشئ ده بطريقه تدريجيه لحد ما الجسم يرجع يتعود تاني ان

كميه الدوبامين المعتدله هي الوضع الطبيعي ليه . و خلال وقت الصيام ده طبعا لازم نحاول القيام باي عمل تاني زي القراءه او ممارسه الرياضه و مع مرور الوقت هيشعر الانسان بالاستقرار النفسي لانه بدا يرجع شخص طبيعي و بالتالي ده هينعكس علي اداؤه في الشغل او المذاكره و هيحسن نسبه التركيز عنده كمان.